በመስቀሉ የተፈጸመው ጋብቻ (በቅዱስ ያዕቆብ ዘስሩግ)

 ትርጉም በዲ/ን ሽመልስ መርጊያ

27/07/2004

“ከእኛ ጌታ በቀር ለእጮኛው ራሱን አሳልፎ የሰጠ ሰው ማን ነው? ከቤተ ክርስቲያንስ በቀር የሞተ ሰው ለእርሱዋ ባልዋ ይሆን ዘንድ የምትሻ ሴትስ ማን ናት? ዓለም ከተፈጠረ ጀምሮ ደሙን የጥሎሽ ስጦታ አድርጎ ያቀረበ ሰው ማን ነው? በመስቀል ላይ ራሱን መሥዋዕት አድርጎ ካቀረበ  ከአንድዬ በቀር ጋብቻውን በሕማሙ ያተመ ሰው ማን ነው ? ከሞተ አካል መጽናናት ታገኝ ዘንድ በእቅፎቹዋ ይዛ በሰርግዋ በዓል ላይ የተገኘች ሙሽራ ከዚህ በፊት ታይታ አትታወቅም ? በየትኛውስ የሰርግ በዓል ላይ ነው የሙሽራውን ሥጋ በመቁረስ በሰርጉ ለታደሙት እንግዶች መብል ይሆን ዘንድ የተሰጠው?

ሚስት በባሏ ሞት ምክንያት ፍቺን ትፈጽማለች ፡፡ ይቺ ሚስት ግን በውድ ባሏ ሞት ምክንያት ከእርሱ ጋር ፍጹም ተዋሕዶን አደረገች፡፡ እርሱ በመስቀል ላይ ራሱን በመሠዋት ቅዱስ የሆነውን ሥጋውን ሁሌም ትመገበው ዘንድ  ክብርት ለሆነችው ሙሽራው መብል አድርጎ አቀረበላት ፡፡ ጉኑንም በመወጋት ቅዱስ ደሙን በጽዋው ሞልቶ ሰጣት ፡፡ በዚህም ምክንያት በልቡዋ ያኖረቻቸው ጣዖታት ሁሉ ተወገዱላት ፡፡ በእርሱም ቅዱስ ቅባት ከበረች ፤ እርሱንም በጥምቀት ውኃ ለበሰችው ፤ በሕብስት መልክ ተመገበችው ፤ እንደ ወይንም ጠጣችው ፡፡ በዚህም ምክንያት ሁለቱ በፍጹም ተዋሐዱ  አንድ እንደሆኑ ዓለም ሁሉ አወቀ ፡፡

ሙሽሪት ውዱዋ በመስቀል ላይ ተቸንክሮ በመሞቱ ምክንያት በማንም አለወጠችውም ፡፡ በእርሱ ሞት ሕይወትን አግኝታለችና ለእርሱ ትልቅ ፍቅር አደረባት ፡፡ ባልና ሚስት ለዚህ ምሥጢር ዋነኞቹ ምሳሌዎች ናቸው ፡፡ እነርሱ ለእውነተኛው ጋብቻ እንደ ምሳሌና እንደ ጥላ የሚያገለግሉ ናቸው ፡፡ በእነርሱ መስሎ ሙሴ ይህን ታላቅ ምሥጢር ተናገረ ፡፡ ሙሴ ይህን ምሥጢር በመሸፈኛ ከልሎታልና ተሰውሮን ነበር ፡፡ ሐዋርያ ቅዱስ ጳውሎስ ግን ገለጠልን፡፡ ሙሴ “ሁለቱ አንድ ሥጋ ይሆናሉ”በማለት በምሥጢር የተናገረውን “እኔ ግን ይህን ስለክርስቶስና ስለቤተክርስቲያን ይላለሁ” (ኤፌ.5፡32)በማለት ተረጎመው፡፡”