ስለድንግል ምልጃ ከመነገሩ በፊት የሚቀድመው ቁም ነገር!!!

በዲ/ን ሽመልስ መርጊያ

27/10/2004

ቅድስት ድንግል ማርያም ነጻ ፈቃዷን ተጠቅማ “ይኩነኒ በከመ ትቤለኒ” በማለት ለመዳናችን ምክንያት የሆነችን እናት ናት፡፡ እርሱዋ በአንደበቱዋ “ነፍሴ በእግዚአብሔር ደስ ይላታል መንፈሴም በአምላኬ በመድኀኒቴ ሃሴትን ታደርጋለች” ብላ እንደገለጠችልን ሥጋዋን ብቻ ሳይሆን  ነፍሱዋንና ሕሊናዋን ለጌታ ማደሪያ በማድረግ ለእኛ ክርስቲያኖች አብነት የሆነች የመጀመሪያይቱ ክርስቲያንና  አማናዊቱ ቤተክርስቲያን ናት፡፡

እኛም ቅዱስ ሥጋውን ክቡር ደሙን በሥጋችን ቤተ መቅደስ፤ ሕጉንና ፈቃዱን እንዲሁም መንፈሱን በነፍሳችንና በሕሊናችን ማኅደር በማሳደር እርሱዋን እንመስላታለን፡፡ ስለዚህም ቅዱስ ጳውሎስ ስለእርሱዋና ስለእኛ በአንድነት ሲናገር“እንደ ንጽሕት ድንግል እናንተን ለክርስቶስ ላቀርብ ለአንድ ወንድ አጭቻችኋለሁ”አለን(2ቆሮ.12፡2)

 ክርስትናን ከቅድስት ድንግል ማርያም፤ ቅድስት ድንግል ማርያምን ከክርስትና ነጣጥሎ ማስቀመጥ የማይቻል ነው፡፡ አማኑኤል፣ ኢየሱስ፣ ክርስቶስ፣ መድኃኒዓለም፣ መባሉ በድንግል ነው፡፡ እነዚህ ሁሉ ስሞች የሥጋዌው ስሞቹ ናቸው፡፡ መዳንን ያገኘነው በሥጋዌው በፈጸመልን የድኅነት ሥራዎቹ ነው፡፡ መታመም፣ መገረፍ፣ መራቡ፣ መጠማት፣ መሰቀል፣ መሞት የሥጋ ባሕርያት ናቸው፡፡ እነዚህ ለእኛ መዳን ምክንያቶች ናቸው፡፡ ክርስቶስ በመስቀል ላይ ተሰቅሎ ሞትን በሞቱ ድል ባይነሣልን ኖሮ ፈጽሞ ባልዳንን ነበር፡፡ ትንሣኤው በኃጢአት ምክንያት ለወደቀችው ድንኳን ለተባለችው ሥጋችን ትንሣኤዋ ነው፡፡ ይህ ሁሉ የተፈጸመው እግዚአብሔር ቃል ከእናታችን በነሣው ሰብእና ነው፡፡ ስለዚህ ክርስትናን ከቅድስት ድንግል ማርያም፤ ቅድስት ድንግል ማርያምን ከክርስትና ነጣጥለን መመልከት አይቻለንም፡፡ እነዚህ ከማማለድ በላይ በእርሱዋ “ይሁንታ” የተጠቀምንባቸው የድኅነታችን ምክንያቶች ናቸው፡፡

እናም ክርስቲያን እርሱዋን መስሎ በሕሊናውም በሥጋውም የአምላክ ማደሪያ ይሆን ዘንድ ተጠራ እንጂ ኃጢአትን አፍቅሮ በኃጢአት የሚገኘውን ደስታ ሽቶ እየኖረ መንግሥተ ሰማያትም እንዳትቀርበት በድንግል ምልጃ ተደግፎ እንዲኖር አይደለም፡፡ አዎ! የእርሱዋ ጸሎት በጽድቅ መንገድ ላሉትና ከዘርዋ የተቆጠሩትን ይታደጋቸዋል ያግዛቸዋል፡፡ የሐዋርያትና የነቢያት እንዲሁም በምድር በእግዚአብሔር ፊት የሚቆመው እግዚአብሔር አምላክ ይሰማው ዘንድ የክህነትን ስልጣን የሰጠውን የካህኑ ምልጃና ጸሎት እኛን ወደ መንግሥቱ እንድንገባ ያግዘናል፡፡ ነገር ግን ሊስተዋል የሚገባው ቁም ነገር ምንድነው? በጽድቅ መንገድ ካልሆንን በ1ቀር የቅድስት እናታችን፣ የሐዋርያትና የነቢያት እንዲሁም የካህናት ጸሎት ለእኛ ምንም የሚፈይድልን ነገር አለመኖሩን ነው፡፡

ወገኖች ሆይ! ቅድስት እናታችን ታማልደናለች ብቻ በማለት አንመላለስ፤ ይልቁኑ እርሱዋን ለመምሰል እንትጋ እንጂ፡፡ እርሱዋ ለእኛ መዳን ምክንያት የሆነችበት ዋናው ምክንያት ሰውነቱዋን ከኃጢአት ጠብቃ በመገኘቱዋ ነው፡፡ እኛም ሰውነታችንን እርሱዋን አብነት አድርገን ከኃጢአት ጠብቀን የተመላለስን እንደሆነ ልመናዋና ጸሎቱዋ እንዲሁም ምልጃዋ ሲያግዘን እናኘዋለን፡፡ የእኛም ቅድስና በራሱ ለቤተሰቦቻችንና ለወገኖቻችን እንዲሁም ለዓለም በመትረፍ ለብዙዎች መዳን ምክንያት ይሆንልናል፡፡ ነገር ግን እንደው ዝም ብሎ ያለምንም በጎ ሥራ በምለጃዋ ላይ ብቻ በመንጠልጠል የምንድን እንዳይመስለን እንጠንቀቅ፡፡ ዘርዋ የሆነውን ክርስቶስን በተግባራዊ ምልልሳችን እንምሰለው፡፡ እንዲያ ከሆነ ብቻ ነው ጸሎቱዋና ልመናዋ እኛን ሲያግዘንና ሲረዳን የምናገኘው፡፡

 እባካችሁ ክርስቲያኖች ከሌሎች ጋር በጠብ ለመፋጠጥ ስንል ይህን ቃል መጠቀምን አንምረጥ፡፡ አስቀድመን ራሳችንን በቅድስና ሕይወት ለማኖር እንድከም በዚህም ራሳችንን በቀጭኗ ጎዳና እናመላልስ፡፡ በዚያችም ጎዳና የቀደሙንን ቅዱሳንን፣ የሚራዱንን ቅዱሳን መላእክትንና ቅዱሳን ነፍሳትን እናገኛቸዋለን፡፡ ለሚጠይቁንም እንደሚገባቸው አድርገን በቀላሉ በሕይወታችን የተረዳነውን በቃላችን ወይም ለእኛ በተሰጠን ጸጋ በኩል መልሱን በመስጠት እነርሱን ወደ እምነት ልናመጣቸው እንችላለን፡፡ ስለምልጃዋ ከመናገራችን በፊት መቅደም ያለበት ግን ራሳችንን በጽድቅ ሕይወት ማቆም ነው፡፡ በመቀጠልም በእርሱዋ የምናገኘውን እርዳታ ተስፋ ማድረግ ይሆናል፡፡

 እንዲያ ካደረግን ብቻ ነው የእርሱዋ ጸሎትና ልመና እኛን እንደተራዳን አፋችንን ሞልተን መናገር የሚቻለን፡፡ነገር ግን እኛ በኃጢአት ጭቃ ውስጥ ተዘፍቀን ከፍቅር ርቀን እየኖርን ድንግል ታማልዳለች ብንል ማን ሊያምነን ይችላል? ስለዚህም አስቀድመን በሕይወታችን እርሱዋን ለመመሰል እንትጋ፡፡ እንዲህ ካደረግን ስለምልጃዋ አንደበታችን ሳይሆን ሕይወታችን ምስክር ይሆንልናል፡፡ ድንግል ሆይ አንቺን መስለን ነፍሳችን በልጅሽ ፍቅር እንዲቀጣጠል፣እርሱን መስለን ለዓለም ብርሃን ሆነን እንድናበራ፣ የጠፉትን የልጅሽን መንጎች ወደ ዘለዓለማዊው ማደሪያቸው እንድናገባቸውና በፈጣሪያቸው ፍቅር ሰክረው ለዘለዓለም በደስታ እንዲኖሩ ለምኝልን ለዘለዓለሙ አሜን!!!