ድንቅ ግን እውነት

ዲ/ን ሽመልስ መርጊያ

23/02/2005

ክብር ይግባውና ስለ ድንቅ እምነቱ እግዚአብሔር አብርሃምን ለአሕዛብ አባት አደረግሁ አለው፡፡(ዘፍ.17፡7-8፤ሮሜ.4፡12) ድንቅ ስለሆነውም በእምነት መታዘዟ እግዚአብሔር ሣራን የአሕዛብ እናት አደረጋት፡፡ ስለእርሱዋ እግዚአብሔር “እባርካታለሁ ደግሞም ከእርሱዋ ልጅ እሰጥሃለሁ እባርካታለሁ የአሕዛብም እናት ትሆናለች፡፡”(ዘፍ.17፡16)ብሎ ተናገረላት፡፡

ንጉሥ ዳዊትም እንዲሁ ከልጅነቱ ጀምሮ ልቡን የመንፈስ ቅዱስ ማደሪያ፣ አንደበቱን የመንፈሱ አገልጋይ በማድረጉ እንደ ልቤ ተባለ፡፡ ከእርሱም ዘር ክርስቶስ እንዲወለድ “ዘርህን ለዘለዓለም አዘጋጃለሁ፤ ዙፋንህንም ለልጅ ልጅ እመሠርታለሁ፡፡”(መዝ.88፡4) እንዲሁም “ከወገብህ የሚወጣውን ዘርህን ከአንተ በኋላ አስነሣለሁ መንግሥቱንም አጸናለሁ፡፡ እርሱ ለስሜ ቤትን ይሠራል የመንግሥቱም ዙፋን ለዘለዓለም አጸናለሁ” አለው፡፡ ይህን ቅዱስ ዳዊት በመንፈስ አስተውሎ “ጌታዬ ሆይ! እግዚአብሔር ሆይ ! እስከዚህ ያደረስኸኝ እኔ ማን ነኝ? ቤቴስ ምንድን ነው? ጌታዬ እግዚአብሔር ሆይ! ይህ በፊትህ ጥቂት ነበረ፤ ስለባሪያህም ቤት ደግሞ ለሩቅ ዘመን ተናገርህ፤ ጌታዬ እግዚአብሔር ሆይ! ይህ የሰው ሕግ ነው፡፡(2ሳሙ.7፡12-4፤ 18-19) ብሎ ጌታውን አመሰገነ፡፡ በዚህ ቦታ ይህ “የሰው ሕግ ነው” ያለው “ክርስቶስን መምሰል” ነው፡፡  ሐዋርያው ቅዱስ ጳውሎስ ይህን ለማስረዳት "የሚያምኑ ሁሉ ይጸድቁ ዘንድ ክርስቶስ የሕግ ፍጻሜ ነውና” ብሎ ጽፎልናል፡፡(ሮሜ.10፡4)

“ድንቅ ግን እውነት” የሆነው እውነታ ፡- እነዚህ በድንቅ እምነታቸው እና በእምነት መታዘዛቸው የተመሰከረላቸው እንዲሁም ከነፍሳቸው ጌታን የሚወዱና እግዚአብሔር ለቅዱሳኑ ያወርሳቸው ዘንድ ያዘጋጃትን መንግሥቱን በመንፈስ የተረዱ ሁሉ የእናታችን የቅድስት ድንግል ማርያም አካላዊ ምሳሌ መሆናቸው ነው፡፡ ይህን ለመረዳት ስለነቢዩ ኤልያስና ስለመጥምቁ ዮሐንስ ማወቁ ሳይቀድም አይቀርም፡፡ ነቢዩ ኤልያስ ለመጥምቁ ዮሐንስ አካላዊው ምሳሌ እንደ ነበረ መጽሐፍ ቅዱስ ያስረዳናል፡፡ ይህን አስመልክተው ጌታችን በደብረ ታቦር ተራራ ላይ ግርማ መለኮቱን ለሦስቱ ሐዋርያት ካሳየ በኋላ ሐዋርያት “እንግዲህ ጻፎች፡- ኤልያስ አስቀድሞ ሊመጣ ይገባል ስለምን ይላሉ?” ብለው ጌታን በጠየቁት ጊዜ “ኤልያስማ አስቀድሞ ይመጣል ሁሉንም ያቀናል ነገር ግን እላችኋለሁ ኤልያስ ከዚህ በፊት መጣ የወደዱትንም ሁሉ አደረጉበት እንጂ አላወቁትም”(ማቴ.17፡ 10-12) ብሎ መለሰላቸው፡፡ በዚህም ኤልያስ የቅዱስ ዮሐንስ መጥምቅ አካላዊ ምሳሌ እንደነበረ መረዳት እንችላለን፡፡

እንዲሁ ለአብርሃም በዘርህ አሕዛብ ይባረካሉ የሚለው የተስፋ ቃል እውን የሆነው በእናታችን በቅድስት ድንግል ማርያም ነው፡፡ ስለዚህም አብርሃም ለእናታችን ለቅድስት ድንግል ማርያም አካላዊ ምሳሌ ነበር ማለት ነው፡፡ ስለዚህም አብርሃም የሁሉ አባት እንደሆነ ቅድስት ድንግል ማርያምም ክርስቶስን ወልዳ እውነተኛይቱ አብርሃም ሆናለችና በእምነት እርሱዋን ለመሰሉዋት ሁሉ አባት ናት፡፡ እንዲሁ በእምነት በመታዘዝ “የአሕዛብ እናት አደርጋታለሁ” በማለት ተስፋ የተሰጣት ሣራ ለእናታችን አካላዊ ምሳሌ ነበረች፡፡ ለአብርሃም “ከእርሱዋ ልጅ እሰጥሃለሁ አባርካታለሁ የአሕዛብም እናት ትሆናለች” የተባለው በእውነት የተፈጸመው በድንግል ማርያም ነው፡፡ ስለዚህ አማናዊቱ የሕዝብና አሕዛብ ሁሉ እናት የተባለችው እናታችን ቅድስት ድንግል ማርያም ናት ማለት ነው፡፡ ሣራ ግን ለቅድስት ድንግል ማርያም አካላዊ ምሳሌዋ ነበረች፡፡

እንዲሁ ንጉሥ ዳዊት ለእናታችን ለቅድስት ድንግል ማርያም አካላዊ ምሳሌ ነበር፡፡ እግዚአብሔር ለዳዊት “ከወገብህ የሚወጣውን ዘርህን ከአንተ በኋላ አስነሣለሁ፡፡ የመንግሥቱም ዙፋን ለዘለዓለም አጸናለሁ፡፡” ብሎ አስቀድሞ ተናግሮለት ነበር፡፡ ይህም በእርሱ ዘመን የሚፈጸም እንዳልሆነ በመንፈስ በመረዳቱ “ስለባሪያህም ቤት ደግሞ ለሩቅ ዘመን ተናገርህ” አለ፡፡ ይህ የተስፋ ቃል በቅድስት ድንግል ማርያም እውን ሆኖአል፡፡ ስለዚህም በአብሣሪው መልአክ በቅዱስ ገብርኤል አንደበት ስለልጁዋ ስለክርስቶስ “የአባቱን የዳዊትን ዙፋን ይሰጠዋል፡፡ በያዕቆብ ቤትም ላይ ለዘለዓለም ይነግሣል፤ ለመንግሥቱም ፍጻሜ የለውም፡፡”(ሉቃ.1፡32-33)ተባለላት፡፡ ስለዚህ አማናይቱ ዳዊት ቅድስት ድንግል ማርያም ናት፡፡ ስለዚህም ልጁዋ በእርሱዋ የዳዊት ልጅ ተባለ፡፡ እንዲሁ የጌታችን ቅም ቅም አያቶች ሁሉ በቅድስት እናታችን በኩል የእርሱ አባትም እናትም ሆኑ፤ በልጁዋም የእግዚአብሔር ልጆች ተሰኙ፡፡

 በቀዳማዊው አዳም ሰውነት የሰው ዘር ሁሉ አንድ እንደ ነበረ እንዲሁ ለክርስቶስ የተገቡ ቅዱሳን ሁሉ በእናታችን ቅድስት ድንግል ማርያም ሰውነት አንድ አካል ሆኑ፡፡ በእርሱዋም እርሱ የአብርሃም ልጅ፣ የሣራ ልጅ፣ የዳዊት ልጅ፣ እንዲሁም በእምነታቸውና በቅድስናቸው እግዚአብሔርን ደስ ያሰኙት ሁሉ ልጅ ተባለ፡፡በእርሱም የእግዚአብሔር ልጆች ተባሉ፡፡ ከእርሱዋም በነሣው ሰውነት ልጁዋ ክርስቶስ እኛን ከእነዚህ ቅዱሳን ኅብረት ደመረን፡፡ አብረንም ከርስቱ ተካፋዮች ሆንን ፤ ከዘርዋም ተቆጠርን፡፡ በእርሱም የእግዚአብሔር ልጆች ተባልን፡፡ ስለዚህም ሐዋርያው ቅዱስ ጳውሎስ “እንግዲያስ ከእንግዲህ ወዲህ ከቅዱሳን ጋር ባላገሮችና የእግዚአብሔር ቤተ ሰዎች እንጂ እንግዶችና መጻተኞች አይደላችሁም” ተባለለን፡፡(ኤፌ.2፡19) እንዲህም ስለሆነ እናታችን ቅድስት ድንግል ማርያም ብሉዩንና ሐዲሱን በልጁዋ አንድ ያደረገች አማናዊቱ ቤተክርስቲያን እንደሆነች ለሁላችን የተረዳ ነገር ሆነ፡፡

 ልጁዋ መንግሥትንና ክህነትን ጠቅልሎ ለእርሱ እንዳደረገ እንዲሁ የሥጋ አባትነትና እናትነት ተጠቅለለው ለእርሱዋ ሆኑ፡፡ ስለዚህም ቀዳማዊው አዳም ለሔዋን እናትም አባትም እንደነበረ፤ ቅድስት ድንግል ማርያምም ለጌታችን በሥጋ እናትም አባትም ሆና እንዳሳደገችው፤ እንዲሁ ለእኛ በክርስቶስ ላመንነው ቅድስት ድንግል ማርያም በሥጋ እናትም አባትም ሆነችን፡፡ 

ከእንግዲህ ከአብርሃም የሚልቅ እምነት፣ ከሣራ የሚልቅ በእምነት መታዘዝ፣ ከዳዊት የሚልቅ የልብ ንጽሕና ያላትን ቅድስት ድንግል ማርያምን በሕይወታችን ሁሉ አብነት አድርገን እንመላለስ፡፡ ስለዚህም እርሱዋ “ነፍሴ ጌታን ታከብረዋለች መንፈሴም በአምላኬና በመድኀኒቴ ሐሴትን ታደርጋለች” እንዳለች እኛም እንደ እርሱዋ አምላካችንን ከነፍሳችን ልንወደው፣ ልናከብረውና በእርሱ ደሰ ሊለን ይገባል፡፡ እርሱዋ እርሱን በሥጋ ጸንሳ እንደወለደችው በዚህም ሰውነቱዋንና ነፍሱዋን የጌታ ቤተመቅደስ እንዳደረገች እኛም “እርሱ በእኛ እኛም በእርሱ” ከምንሆንበት ከታላቁ ምሥጢር ከቅዱስ ሥጋውና ከክቡር ደሙ በመቀበል ሥጋችንንና ነፍሳችንን የእርሱ ቤተመቅደስ ልናደርገው ይገባናል፡፡ ይህን በረጋ መንፈስና በተመስጦ ሆኖ ለሚያስተውለው እጅግ ግሩምና ድንቅ የሆነ ምሥጢር ነው፡፡ አምላካችን ሆይ! ይህን ድንቅ ግን እውነት የሆነውን ሕይወት እያንዳንዳችን እንድናስተውለውና ለብሰነው እንድንመላለስበት የበቃን አድርገን፡፡ ለአንተ ከዘለዓለም እስከ ዘለዓለም ክብር ይሁን አሜን!!!