እኔ ከመጽሐፍ ቅዱስ ይልቅ ራሱ መንፈሱ የእምነት ምንጭ ነው እላለሁ

ከዲ/ን ሽመልስ መርጊያ

19/04/2005

በመጽሐፍ ብቻ የሚለው አመለካከት ለእኔ  ትክክል አይመስለኝም፡፡ ከመጽሐፍ ይልቅ በልብ ሰሌዳ በመንፈሱ የተጻፈ የመንፈስ ቅዱስ መልእክት አለ፡፡ መንፈሱ ያደረበት ሰው የማይመረመረውንና የማያልቀውን የእግዚአብሔርን ሃሳብና ፈቃድ ወደ መረዳት ይመጣል ሁሌም መንፈስ ቅዱስ ሰማያዊ የሆኑ በመጽሐፍ ቅዱስ ላይ ያልሰፈሩ ወይም ያልተብራሩ እውነታዎች ይገልጥለታል፡፡

 በብሉይም በሐዲስም የእግዚአብሔር ፈቃድና ሃሳብ በወረቀት ላይ በብዕር ቀለም መጻፍ ያስፈለገበት ምክንያት ሰዎች አስቀድሞ እግዚአብሔር በመንፈሱ በልባቸው ጽላት ላይ የጻፈውን ፈቃዱንና ሕጉን በኃጢአት ምክንያት ፈጽመው በመዘንጋታቸው ነው፡፡ ስለዚህም መጽሐፍ ቅዱስ ሰዎች ፈቃዱን አውቀው በጽድቅ ይመላለሱ ዘንድ የተሰጠ ሁለተኛው እድል ነው፡፡ ለዚህ ማሳያው ከአዳም እስከ ሙሴ ድረስ ያሉ ቅዱሳንና ሐዋርያት እንዲሁም ሐዲስ ኪዳን ሳይጻፍላቸው በሐዋርያት ትምህርት ይኖሩ የነበሩ ቅዱሳን ክርስቲያኖች ናቸው፡፡

ሐዋርያት በስብከታቸው ማርከው በንስሐ አቅርበው ልቡናቸውን የመንፈሱ ማደሪያ በማድረግ የእግዚአብሔርን ሃሳብ ሐዋርያት ሲያስተምሩ በሰሚዎቹ ልቡና ያደረው መንፈስ ቅዱስ የትምህርቱን እውነተኝነት በማረጋገጥና እነርሱም በጽሙና ሆነው ለእግዚአብሔር መንፈስ የጠየቁትን ጥያቄ ግልጽ እያደረገላቸው ሰውነታቸውን ከኃጢአት ጠብቀው በቅድስና እንዲመላለሱ ረድቶአቸዋል እንጂ የጽሑፍ መረጃ አልስፈለጋቸውም ነበር፡፡ ከዚህ ተነሥተን የእግዚአብሔር ፈቃድ ልክ እንደ ቅዱሳን መላእክት እንደ እግዚአብሔር መንፈስ ፈቃድ እንዲመሩ እንጂ በወረቀት ላይ በተጻፈ መመሪያ እንዲመላለሱ አይደለም፡፡

 መጽሐፍ ቅዱስ በመንፈስ ቅዱስ ፈቃድ የተጻፈ ነው፡፡ መንፈሱ የሌለበት ምንም መጽሐፍ ቅዱስን ቢያነብ አይረዳውም፡፡ ነገር ግን አንድ ሰው መንፈሱ ሳይኖረው መጽሐፍ ቅዱስን ሸምድዶ በማወቁ የሚታበይ ከሆነ ጸሐፍት ፈሪሳዊያንን ቢመስል እንጂ ዳን አንለውም፡፡ ጻሕፍት ፈሪሳዊያን በመጽሐፍ  ሕይወት የሚገኝ ይመስላቸው ነበር፡፡ ነገር ግን ሕይወት የሆነውን ክርስቶስ በመንፈሱ ሳያቁ ተሰነካክለው ወድቀዋል፡፡ እንዲያ ከሆነ ከመጽሐፍ ይልቅ በመንፈሱ መመራት የላቀ መሆኑ የሚያጠያይቅ አይደለም፡፡ ቢሆንም አሁንም መጽሐፍ ቅዱስ በመንፈስ ቅዱስ ለመመራትና ለማደግ እንደ አንድ እርከን ሆኖ ያገለግላል እንጂ ፍጻሜ አይደለም፡፡ ስለዚህም በመጽሐፍ ቅዱስ ብቻ ነው የሚዳነው የሚለውን አመለካከትን አልቀበለውም፡፡

 ይህ በኦሪት ሥርዐት አንደመላለስ ይቆጠራል፡፡ እነርሱ በወረቀት ላይ በሰፈረ ቃል ብቻ የሚመሩ ናቸው፡፡ በመጽሐፍ ቅዱስ ብቻ የሚለው አመለካከትን የምንከተል ከሆነ ከኦሪታዊያን በምን ተለየን ታዲያ? ይህ ብዙዎችን የራሳቸውን ትርጉም እንዲሰጡ በማድረግ እንደ ራሳቸው ፈቃድ እንዲመላለሱ በር ከፍቶአል፡፡ የእግዚአብሔር መንፈስ ግን አንድ ነው፡፡ በእርሱ የተሰጠው ትምህርት ሁሉ መንፈሱ ያደረባቸውን ሁሉ እንደ አንድ አካል ግን እንደተለያዩ ብልቶች ሆነው የአንዱን አካል የክርስቶስን ፈቃድ እንዲተገብሩ ያበቃቸዋል፡፡ ስለዚህ በእርግጠኝነት ከመጽሐፍ ይልቅ በመንፈሱ መመራት ይበልጣል፡፡ በመንፈሱ ከተመራን ደግሞ ከመጽሐፍ ቅዱስም በላይ ነን፡፡ ነገር ግን ለሕጻናት ከእግዚአብሔር መንፈስ ፈቃድና ሃሳብ ጋር እንዲተዋወቁ መጽሐፍ ቅዱስን ሊማሩ ሊያነቡ ይገባቸዋል፡፡