“ጌታችን መዝጊያህን ዘግተህ…ጸልይ” የማለቱ ትርጉሙ(በአፍርሃት ሶርያዊ)

                 

ትርጉም በዲ/ን ሽመልስ መርጊያ

01/07/2004

“ጌታችን ኢየሱስ ክርስቶስ ጸሎታችን ምን መምሰል እንዳለበት ሲያስተምር “አንተ ግን ስትጸልይ ወደ እልፍኝህ ግባ መዝጊያህንም ዘግተህ በስውር ላለው አባትህ ጸልይ በስውር የሚያይህም አባትህ በግልጽ ይከፍልሃል፡፡”(ማቴ፡፮፥፮)ብሎ አስተምሮአል፡፡ ወዳጄ ሆይ ጌታችን መድኀኒታችን ኢየሱስ ክርስቶስ በምንጸልይበት ጊዜ “ወደ እልፈኝህ ግባ መዝጊያህንም ዘግተህ በስውር ላላው አባትህ ጸልይ” ማለቱ የመኖሪያ ቤትህን ደጅ ዘግተህ ጸልይ ማለቱ ነውን ? እንዲህ ነው ብለህስ ስለምን ትረዳለህ ? ጌታችን እንዲህ ሲል ምን ማለቱ እንደሆነ እስከቻልኩት ድረስ ላብራራልህ እሞክራለሁ፡፡

እርሱ “አንተ ግን ስትጸልይ ወደ እልፍኝህ ግባ መዝጊያህንም ዘግተህ ጸልይ” ሲልህ የልብህን ደጅ በመዝጋት እንድትጸልይ ሲመክርህ አይደለምን ? እኛ ልንዘጋው የሚገባን ጌታ ያዘዘን  በር የቱ ነው ? ቤቱ ሰውነታችን ፣ በሩ ልባችን ካልሆነ ሌላ ምን ሊሆን ይችላል ? ሐዋርያው እንዳለው ሰውነታችን ክርስቶስ የሚኖርበት ቤተመቅደሱ ነው፡፡ እርሱ“ሥጋችሁ ከእግዚአብሔር የተቀበላችሁት በእናንተ የሚኖረው የመንፈስ ቅዱስ ቤተመቅደስ እንደሆነ አታውቁምን?” አላለንምን?(፩ቆሮ.፮፥፲፱፣፳) ወደ ውስጥ ሰውነትህ ወይም ወደ ገዛ ቤቱ ገብቶ ያደር ዘንድ አፍህ ለጸሎት ሳይከፈት አስቀድመህ ማረፊያ ቤቱን ማጽዳት ማስተካከል ይገባሃል ፡፡ መልእክቱ ይህ ካልሆነ በቀር ኃይለ ቃሉ ምን የተለየ ሌላ ትርጉም አለው ? ወይስ አንተ ቤትና በር በሌለበት በምድረበዳ ብትሆን እንዲህ ስለሆነ ለሰማይ አባትህ በስውር መጸለይ አይቻልህም ማለት ነውን ? ጌታችን መድኀኒታችን ኢየሱስ ክርስቶስ የሰማይ አባታችን የልባችንን መሻትና አሳብ እንደሚያውቅ “አባታችሁ የሚያስፈልጋችሁን ያውቃልና”(ማቴ፡፮፥፰ )ብሎ አስተምሮናል፡፡

በነቢዩ ኢሳይያስም “እንዲህም ይሆናል ሳይጣሩ እመልስላቸዋለሁ ገናም ሲናገሩ እሰማቸዋለሁ”(ኢሳ.፷፭፥፳፬)ሲል በተቃራኒው ደግሞ “እጃችሁን ወደ እኔ ብትዘረጉ ዓይኔን ከእናንተ እሰውራለሁ ፤ ልመናንም ብታበዙ አልሰማችሁም”ይላል፡፡(ኢሳ.፩፥፲፭) እንዲሁም “ወደ ጆሮዬም በታላቅ ድምፅ ቢጮኹ አልሰማቸውም”(ይለናል፡፡ሕዝ.፰፡፲፰) ጌታችን እንዲህ ያላቸው በሽንገላ ከልብ ያልሆነ ጸሎትን ለሚጸልዩት አይደለምን? እያንዳንዱን ቃል በማስተዋል ሆነህ አድምጥ፤ ትርጉሙን በጥንቃቄ ጨብጥ፡፡ አዳኛችን ክርስቶስ በአንድ ቦታ ይህን የመሰለ ቃል ተናግሮአል፡፡ እናም ምን ለማለት እንደፈለገ በጥንቃቄ አድምጠህ ለይ፡፡

እርሱም “ሁለት ወይም ሦስት በስሜ በሚሰባሰቡበት በዚያ በመካከላቸው እሆናለሁ” የሚል ነው፡፡(ማቴ. ፲፰፥፳) ወዳጄ ሆይ በአንተ በኩል ይህን ኃይለ ቃል እንዴት ትረዳዋለህ ? መድኃኒታችን ሁለትም ሦስትም ሆናችሁ በተሰባሰባችሁበት ቦታ እኔ እገኛለሁ ማለቱ እኔ ብቻዬን ብሆን ክርስቶስ ከእኔ ጋር አይሆንም ማለት ነውን? ምክንያቱም ክርስቶስ በእርሱ በማመን በቅድስና በሚመላለሱት ዘንድ ማደሪያውን እንደሚያደርግ ተጽፎአልና፡፡(ዮሐ.፮፥፶፮-፶፯)  በዚህ ሊያስረዳ የፈለገው ከእርሱ ሊማሩ ሽተው ሁለትም ሦስትም ሆነው ቢሰባሰቡ በመካከላቸው አንደሚገኝ ሊያስተምረን አይደለምን?

ከሁለት ወይም ከሦስት በላይ ወይም ሺህ ሆነው የተሰባሰቡ ነገር ግን ክርስቶስ የማይገኝበት ጉባኤ አለ ፡፡ በተቃራኒው ደግሞ አንድ ብቻ ሆኖ ክርስቶስ ኢየሱስ ከእርሱ ጋር የሆነለት ሰው አለ ፡፡ ስለዚህም ይህ ቃል የተነገረው ቃሉ ለእነርሱ ውብና መልካም ለሆነላቸውና እርሱን ለመስማት ሁለትም ሦስትም ሆነው በጉጉት ለሚጠብቁት ሰዎች ነው ፡፡ እንደ ክርስቶስ ፈቃድ ልቡን ንጹሕ ያደረገ ሰው ክርስቶስ እና በክርስቶስ ሕልው የሆነው እግዚአብሔር አብ ያድርበታል ፡፡ ከዚያም ወዲህ ይህ ሰው ሦስት አካላት ያሉት አንድ ሰው ይሆናል ፡፡ እርሱ ፣ በእርሱ ያደረው ክርስቶስ እና በክርስቶስ ሕልው የሆነው እግዚአብሔር አብ በአንድ ሰውነት ይገለጣሉ ፡፡ በዚህም “እኔ በአብ እንዳለሁ አብም በእኔ  እንዳለ አታምንምን?”(ዮሐ. ፲፬፥፲-፲፩) ያለው የጌታ ቃል እንዲሁም “አኔና አብ አንድ ነን” የሚለው ቃል በዚህ ሰው እውን ይሆናል፡፡ (አፍርሃት እንዲህ ሲል “እኔ በአባቴ እንዳለሁ እናንተም በእኔ እንዳላችሁ እኔም በእናንተ እንዳለሁ በዚያ ቀን ታውቃላችሁ” ብሎ ጌታችን መድኃኒታችን ያስተማረው ትምህርት ለዚህ ሰው ይፈጸምለታል ሲለን ነው እንጂ አምላክ ይሆናል እያለን አይደለም፡፡)(ዮሐ.፲፥፴፤ዮሐ.፲፬፥፳)

በነቢዩም የተነገረው “በእነርሱ አድራለሁ ከእነርሱም ጋር እሄዳለሁ” (ሕዝ.፵፫፥፱፤ቆሮ.፮፥፲፮) የሚለው አምላካዊ ቃል በዚህ ሰው ሰውነት ውስጥ ይፈጸማል፡፡ ጌታችን መድኃኒታችን ኢየሱስ ክርስቶስ ያስተማረውን ይህን ትምህርት በዚህ መልክ መረዳት አለብን፡፡"